Vieiros

O pasado mes de setembro a xunta de goberno do Instituto de Estudos Miñoranos acordou por unanimidade conceder, o premio Nano Cambeiro, na súa sétima edición, ao suplemento mensual A Peneira do Val Miñor do xornal A Peneira tanto polo seu esforzo na difusión e análise da realidade miñorana como por incardinarse na iniciativa xornalista do Miñor, que impulsou Nano Cambeiro, unha das mellores mostras de prensa local que houbo no país. Agora o esforzo da empresa editora d'A Peneira "vén a retomar e a continuar o labor que Nano Cambeiro iniciara".

O premio, sen dotación económica, consiste nunha peza de bronce obra do escultor, e membro do Instituto de Estudos Miñoranos, Fernando Casas, que se funde para entregar en cada convocatoria. No acto intervirán, o presidente da asociación Ponte nas Ondas, Santiago Veloso, que realizará a xustificación do premio ao que responderá o premiado Guillermo Rodríguez, director da Peneira. Será este venres 28 de maio de 2010 ás 20:30 h. na Aula de Cultura Ponte de Rosas, en Gondomar.