Vieiros

"Herdamos dúas unidades cuxos cometidos son exactamente os mesmos e que serviron ao BNG para ter dúas persoas como altos cargos, con todos os gastos económicos que isto conleva", xustificou este venres a secretaria xeral de Igualdade, Marta González. Desde Nova York, onde asiste á 54ª sesión da Comisión Xurídica e Social da Muller da ONU, González dixo estar asombrada polo que definiu de "capacidade do BNG de retorcer a información ata convertela nunha mentira".

Para a secretaria xeral as acusacións do Bloque son "mezquinas" e "mentireiras", e rexeitou que a supresión do Servizo Galego de Igualdade (SGI) vaia supor un retroceso nas políticas de igualdade. Ademais defendeu que o PP "ten toda a lexitimidade para reorganizar a estrutura administrativa herdada do bipartito", e engadiu, "especialmente para obter máis transparencia, eficiencia e aforro". Asegurou González que o futuro modelo será "máis eficiente, lóxico e non suporá redución de recursos nin de servizos". "Será un avance na boa aplicación desas políticas, xa que facilitarán ás mulleres o acceso aos recurso", prometeu.