Vieiros

Dende este domingo, Croacia ten novo presidente, o terceiro dende que en 1991 lograra a independencia política. Ivo Josipovic, de orientación socialdemócrata, ten como principal reto que o seu país entre como membro de pleno dereito na Unión Europea.

A súa ampla vitoria (60,3% dos votos) era agardada. O seu rival foi o actual  alcalde de Zagreb, Milan Bandic, que, aínda que independente, contou tamén co apoio do voto do centrodereita.

Bandic estará ao lado do novo presidente no que se refire á integración na comunidade europea. As xestións, xa avanzadas, poderían dar o froito moi axiña. En Zagreb conta que a entrada na UE poida ser un feito xa no segundo semestre de 2011.