Vieiros

Vieiros de meu Perfil


Fwwwrando

RSS de Fwwwrando
Sexo dixital

India: do Kama Sutra á internet sen porno

Os principais buscadores bloquean os resultados sobre sexo no país, que endureceu as leis anti-pornografía.

Redacción - 13:55 30/12/2009

O país onde se creou o Kama Sutra dispón agora dunha das lexislacións máis restritivas no que se refire ao sexo na internet. Así, segundo unha investigación publicada polo Guardian, varias compañías da rede están a impedir que as persoas do país asiático poidan acceder a contidos "inapropiados".

Aínda que o goberno da India, supostamente, non se puxo en contacto coas multinacionais, Yahoo e o seu servizo de fotografías Flickr xa non permiten desactivar o filtro de "busca segura" dende a India, como xa non o facían en Singapur, Hong Kong e Corea. Pero o primeiro paso deuno Microsoft, que impide que a cidadanía india poida atopar sexo no seu buscador Bing.

A lexislación anti-porno remóntase a hai século e medio, cando se redactou o código penal indio, onde se define obscenidade como "contido lascivo e que ten o efecto de corromper as mentes", e que se adaptou na Lei da Tecnoloxía da Información da India, que prohibe a publicación de material pornográfico.

A medida, á que aínda non se sumou Google, contrasta co feito de que os internautas da India son os responsábeis da meirande parte das buscas de "sexo" de todo o mundo, ou o erotismo que abunda na prensa e no cinema do país asiático.


5/5 (5 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: