Vieiros

A chegada a Galiza do cantante 'reaggea' Sizzla Kalonji está a poñer en pé de guerra aos colectivos de gais, lesbianas e transexuais do país. A razón non é outra que as polémicas letras do vocalista xamaicano, que xa foi denunciado noutros países, tamén no seu propio, por incitar á homofobia. A orixe da polémica está, sobre todo, na letra dunha das súas cancións que chega a afirmar: “mata un maricón e sente orgullo”.

Dende Colega Galicia, que agrupa as asociacións LGBT do país, o seu presidente Rafael Moral salienta que avisarán á policía dos antecedentes do artista como medida de precación diante do concerto programado para o vindeiro venres na sala Capitol (Compostela). Tamén lembra que o cantante xa tivo problemas coas autoridades de Alemania de onde “foi expulsado”.

A presenza de Sizzla tamén está a causar polémica en Cataluña, onde ten previsto un concerto. En 2007, unha súa xira por Canadá estivo rodeada da mesma controversia e do boicot dos grupos LGBT.