Vieiros

Vieiros de meu Perfil


Edición xeral

RSS de Edición xeral
DENUNCIA

Por cada emprego que xera, a industria acuícola recibe medio millón de euros

O BNG presenta unha proposición non de lei na que propón unha moratoria inmediata na instalación de piscifactorías no litoral galego.

Redacción - 19:30 21/09/2009

"A explotación acuícola do noso litoral non debería depender da cor política do Goberno". O que fala é Bieito Lobeira, o portavoz de Pesca do BNG, quen adiantou que os nacionalistas presentarán unha proposición non de lei (PNL) para o debate en pleno no Parlamento. O obxectivo é paralizar a instalación de plantas acuícolas no litoral galego e permitir un repousado debate e avaliación sobre os emprazamentos previstos para a colocación de piscifactorías.

Moratoria e diálogo
Logo dos pasos dados polo actual Goberno, tales como a recuperación do proxecto de instalación dunha planta en Touriñan (Muxía) ou a decisión de permitir a ampliación da de Mougás (Oia), os nacionalistas exixen unha moratoria inmediata na instalación de máis piscifactorías. "É o único xeito de poñer fin a destrución irreversíbel da nosa costa e do seu propio aproveitamento produtivo a través das actividades económicas tradicionais, como pode ser a pesca ou o marisqueo", di Lobeira.

Na súa proposición, o BNG defende tres puntos. O primeiro é a convocatoria dunha mesa de diálogo, formada polo Goberno, concellos, Fegamp, Federación Galega de Confrarías, organizacións ecoloxistas, sindicais e empresas do sector. Esta mesa debería avaliar os emprazamentos previstos para a explotación acuícola, así como desbotar aqueles que se inclúan dentro da Rede Natura.

O segundo exixe a suspensión dos acordos e procesos de tramitación referentes a Cabo Touriñán e Mougás. E o terceiro, pide o deseño de programas de desenvolvemento socioeconómico sustentábel para a xeración de emprego digno no litoral.

Pago de favores e creación de emprego
Lobeira subliña que a Xunta "está a favorecer a empresas vencelladas ao PP" e cualificou de "moi grave" que "se poida permitir o luxo de atentar contra o patrimonio galego" coa construción dunha planta acuícola en Cabo Touriñan. "Dáse a circunstancia", di o documento que se debaterá no Parlamento, "que este aberrante proxecto está promovido precisamente por un grupo empresarial, Pescanova, que gozou dun hiperbólico volume de subsidios públicos para consolidar e impulsar os seus negocios desde que o Partido Popular (1989) goberna o noso país".

Precisamente, o nacionalista recorda o gorentoso que pode chegar a ser o negocio acuícola: "os cartos públicos financian até o 70% dos proxectos". Segundo os datos oficiais da propia Xunta, os 20 proxectos de acuicultura que se van a poñer en marcha recibirán 140 millóns de euros, "mentres que a creación de emprego non supera os 600 postos de traballo". "Non hai máis que facer a media", di Lobeira, "cada posto de traballo contará cun subsidio de medio millón de euros, unha cifra pola que devecería calquera outra industria ou empresa do país".


4,2/5 (5 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: