Vieiros

Vieiros de meu Perfil


Fwwwrando

RSS de Fwwwrando
Proposta no Congreso

Redes sociais só para maiores de 18?

O PP propuxo un paquete de medidas contra a violencia que exixe autorización paterna para que os menores accedan á web 2.0.

Redacción - 11:45 04/09/2009

O Partido Popular propuxo no Congreso dos Deputados que as persoas menores de 18 anos non poidan acceder ás redes sociais da internet sen a autorización dos seus proxenitores. Os deputados Alfonso Alonso, Arturo García Tizón e Santiago Cervera explicaron esta proposta, que forma parte dun Plan Integral contra a Violencia entre os Menores. A principal reforma deste paquete contempla reducir a idade penal dos 14 aos 12 anos.

Os populares queren que os menores de 14 anos non poidan participar en ningunha rede social e que, até os 18, precisen de consentimento, teñan perfís privados e deban indicar o seu nome e documento de identidade. Ademais, Alfonso Alonso pediu máis medidas de seguridade na rede e que se inspeccionen páxinas web para que os menores non poidan acceder "sen control a contidos violentos".

A resposta da voceira socialista de Novas Tecnoloxías no Congreso, Lourdes Muñoz, é que a proposta do PP vai "en contra dos dereitos do menor de acceder á información e socializarse coas súas amizades". Ademais, engadiu que "á dereita", só se lle ocorre "prohibir, cando o que se debería facer é educar". Afirmou que non hai necesidade de implantar o consentimento, do mesmo xeito que tampouco o hai "para ir ao cine, para abrir un enderezo de correo electrónico nin para mercar un libro".

A iniciativa tamén recibiu rapidamente críticas na rede. Por exemplo, o xornalista e blogueiro Ignacio Escolar salienta a contradición que se produce ao pedir que un menor de 12 anos poida ir á cadea pero non teña liberdade para participar en redes sociais até seis anos despois.


5/5 (1 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: