Vieiros

Tanto os peixes de auga doce como os de auga salgada. Todos teñen cabida nun exclusivo hotel para mascotas acuáticas situado no aeroporto internacional de Amsterdam. A idea é que os turistas non teñan que preocuparse polo futuro dos seus peixes cando inicien unha viaxe e, así, poden deixalos nun aloxamento apropiado para eles, no que reciben todos os coidados.

A iniciativa busca, sobre todo, a comodidade dos viaxeiros, que poden deixar os seus peixes cando saen de viaxe e recollelos cando regresan. A única condición para deixar a súa mascota no albergue é reservar as vacacións a través dunha axencia de viaxes que conte coa posibilidade de ofrecer este servizo.

A empresa garante que cada peixe se hospedará nun acuario independente, para evitar un eventual conflito entre hóspedes, nunha zona acondicionada na plana baixa do aeroporto. Con todo, segundo figura no contrato, se se produce unha morte inesperada, a axencia non se fará responsábel xa que hai que ter en conta a alta mortaldade deste tipo de mascotas.