Vieiros

Alejandro Vargas, pianista e compositor cubano, premio Cubadisco en 2008 ao mellor disco de Jazz con "Trapiche", chega a Galiza para encher os teatros con repertorio do órgano oriental e composicións propias nun concerto de jazz de cámara cubano. Nacido en Holguín e residente na Habana, Vargas estará acompañado de José Manuel Díaz ao contrabaixo e Raciel Jiménez á batería. O 18 de xullo fecharán o Seminario de Jazz de Burela nun concerto ás 21h no Auditorio, e o 28 de xullo tocarán no Verbum de Vigo, ás 21h. Vargas tamén ofrecerá unha master class en Burela este sábado ás 16:30h.

Mais o trío vén a Galiza para participar do espectáculo da DESCARGA AO VIVO do que Vargas é director musical. Responsabilidade que comparte cos galegos Pedro Pascual, profesor da Central Folque, compositor, arranxista, produtor musical, músico de Marful e Marcos Teira, compositor, arranxista, músico de Marful, Narf, U-lo Trío e recoñecido intérprete de guitarra flamenca.