Vieiros

Vieiros de meu Perfil


Edición xeral

RSS de Edición xeral
O PSdeG di que o plan “non é ningunha novidade”

Feijoo anuncia un investimento de 30 millóns de euros para terminar co paro de longa duración

Os socialistas acúsano de "recortar" en 8,8 millóns de euros os plans de contratación de desempregados que deixou o bipartito.

Redacción - 15:00 10/06/2009
Feijoo, durante a súa comparecencia no Parlamento, esta cuarta feira

Feijoo, durante a súa comparecencia no Parlamento, esta cuarta feira

O presidente da Xunta, Alberto Núñez Feijoo, anunciou esta cuarta feira un novo plan para terminar co paro de longa duración, que consiste nunha inxección de 30 millóns de euros, a investir en convenios cos concellos para que catro mil parados sen prestacións económicas nin subsidios, "poidan acceder a un posto de traballo".

Alén disto, en resposta ás preguntas presentadas no Parlamento por nacionalistas e socialistas, Feijoo culpou á Xunta do bipartito de deixarlle unha "herdanza" moi negativa, por un lado en canto á "recesión económica"; e polo outro, en canto á "insuficiencia orzamentaria", que cifrou en 1.200 millóns de euros. Alén disto, asegurou que a anterior Consellaría de Traballo tiña "embalsamados" varios expedientes de regulación de emprego, que afectaban a 10 mil traballadores, "mentres lle concedeu 30 millóns, sen asegurar o futuro do seu cadro de persoal, a unha empresa que agora ten problemas".

O líder dos populares galegos e presidente da Xunta tamén quixo salientar que o seu goberno concedeu, "en 50 días, 2.850 axudas da Lei de Dependencia", o que supón, segundo subliñou, o 30% "da totalidade do que o fixo o bipartito en dous anos".

O PSdeG acusa a Feijoo de "recortar" os plans de contratación do bipartito
Polo seu lado, o voceiro de Traballo do Grupo Parlamentario Socialista, José Tomé Roca, denunciou que os 30 millóns de euros, anunciados polo presidente da Xunta para contratar a catro mil parados sen prestacións, supoñen "un recorte" de 8,8 millóns de euros dos plans de cooperación local para a contratación de desempregados que deixou o bipartito -que estaba dotado con 38,8 millóns de euros.

A través dun comunicado, Tomé Roca asegurou que o "recorte orzamentario" que prevé "aplicar" Núñez Feijoo, supón "rebaixar" en dúas mil persoas o número de parados empregados por parte dos concellos, "ao pasar de seis mil contratados en anos anteriores, a só catro mil". Nesta liña, o deputado socialista tamén sinalou que o plan de Feijoo "non é ningunha novidade", xa que se tiña realizado "nos últimos anos" de goberno bipartito.

Finalmente, os socialistas censuraron a medida, por tratarse "dun recorte das expectativas laborais dos desempregados, en época de crise", sinalando que tamén é unha "confirmación" de que o PPdeG "carece dun programa de emprego favorábel para os traballadores". Para concluír, Tomé Roca preguntoulle a Feijoo en que vai investir o seu goberno os 8,8 millóns de euros que lle sacou a este plan.


5/5 (1 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: