Vieiros

O presidente da Xunta, Alberto Núñez Feijóo, comprometeuse este domingo en Láncara, onde presidiu os actos do Día das Letras, a "promocionar o uso do galego sen impoñelo". Sobre a manifestación en Santiago a favor da lingua, Feijóo dixo que "hai que respectar calquera tipo de formulación", pero advertiu de que "hai que desconfiar daqueles que queren apropiarse do que é de todos". Así, engadiu que "o BNG e forzas que apoian ao BNG están facendo unha manifestación", mentres o PPdeG fai un acto "no lugar onde naceu Piñeiro". Neste sentido, afirmou que o galego "é de todos, non ten siglas e é un idioma oficial en Galiza, xunto co español", polo que considerou que o Goberno defenderá "calquera dos dous idiomas". "A cordialidade do galego está por riba de calquera sigla", dixo.

Feijóo concluiu que "un idioma empeza a correr riscos cando se impón", xa que a lingua, "cando se quere, utilízase con cordialidade". Na súa opinión, "esa é a garantía máxima de que persista".