Vieiros

Vieiros de meu Perfil


Edición xeral

RSS de Edición xeral
Iniciativa do BNG no Senado

Demándanlle ao goberno español que recoñeza a fibromialxia como enfermidade "incapacitante"

Tamén piden que se promova un labor de "sensibilización e formación" dos sanitarios. Esta doenza causa o 6% das consultas de Atención Primaria en Galiza.

Redacción - 15:00 11/05/2009
Pérez Bouza e Dolores Bermúdez, na conferencia de prensa

Pérez Bouza e Dolores Bermúdez, na conferencia de prensa

O senador do BNG, Xosé Manuel Pérez Bouza, acompañado da presidenta da Asociación Galega de Fibromialxia (Agafi), Dolores Bermúdez, demandoulle ao goberno español que "recoñeza" esta doenza como "incapacitante", e que promova, ao tempo, "labores de sensibilización e formación" para os profesionais sanitarios, unha medida que xa foi adoptada noutros países europeos.

En conferencia de prensa, anticipándose á celebración do Día Mundial da Fibromialxia -esta terza feira, día 12 de maio-, Pérez Bouza explicou que estas peticións formuláronse a través dunha iniciativa no Senado, na que agardan contar co apoio dos outros grupos, para que saia adiante, e "as administracións e as empresas" adapten os labores dos seus empregados que a sofren, persoas -o 95% mulleres-, que "traballan moitos anos en condicións desaxeitadas". Nesta liña, o senador nacionalista tamén lle pediu ao Goberno Galego "que siga o camiño comezado", e mellora a atención das persoas doentes, facéndolle caso a unha iniciativa nesta liña que se aprobou a pasada lexislatura no Parlamento.

Denuncian a "indefensión" do paciente, o 90% mulleres
O senador nacionalista tamén denunciou a "incomprensión e indefensión" que sofren a diario as persoas que padecen fibromialxia, unha enfermidade crónica que, lembrou, está recoñecida pola Organización Mundial da Saúde (OMS) dende 1992.

Porén, ao non estar recoñecida como enfermidade incapacitante no Estado Español, as persoas que a padecen tampouco poden solicitar baixas laborais ou prestacións sociais.

Os problemas da fibriomialxia, unha doenza "invisíbel"
Na súa quenda de palabra, a presidenta da Agafi, Dolores Bermúdez, lembrou que "esta enfermidade conleva moita incomprensión e invisibilidade para as persoas que a padecen, xa que non se coñece na sociedade e non existe un protocolo de diagnóstico sanitario para detectar e cuantificar os seus síntomas, o que provoca que os médicos infravaloren os seus efectos e mesmo cheguen a considerar que se trata dun problema psicolóxico". Nesta liña, Bermúdez lembrou que unha das dificultades á que se enfrontan as persoas que padecen esta doenza é a de obter un diagnóstico, xa que este proceso chega a converterse, segundo dixo, "nunha auténtica peregrinaxe" de médico a médico, pasando polas listaxes de espera.

A seguir, Bermúdez denominou a fibromialxia, "enfermidade por descarte", xa que se diagnostica despois de pasar o enfermo por "varios profesionais", polo que demandou máis formación e coñecemento da doenza entre os médicos de cabeceira. Nesta liña, sinalou que o 6% das consultas e Atención Primaria en Galiza, corresponden a pacientes que padecen fibromialxia.


5/5 (3 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: