Vieiros

Vieiros de meu Perfil


Edición xeral

RSS de Edición xeral
Incidentes en Mugardos, en 2001

A Xunta pide máis de cinco anos de cadea para o secretario da CIG en Ferrolterra

López Pintos está acusado dun delito de 'atentado contra axentes da autoridade', supostamente cometido nunha manifestación.

Redacción - 20:00 10/02/2009

Cinco anos e tres meses de prisión, 20 fins de semana de arresto e unha multa de 10 meses a razón de 30 euros o día. Esta é a petición de condena que fai a Xunta de Galiza para Xesús Anxo López Pintos polos sucesos producidos na Confraría de Mugardos en setembro de 2001 nos que resultou ferido un axente da Policía Nacional. A demanda de pena é aínda máis dura ca da Fiscalía, que solicitaba dous anos e medio de prisión e inhabilitación especial para o sufraxio pasivo.

Os feitos remóntanse até hai oito anos, cando era patroa maior do pósito de Mugardos Oliva Bonome. Un sector dos armadores e socios estaban en contra da súa xestión (mesmo foi acusada dun delito de prevaricación e de apropiación indebida cometido durante o seu mandato) e en diferentes concentracións exixiron a convocatoria urxente de eleccións e a presentación das contas da entidade. Foi nun destes actos cando se produciron os altercados polos que agora se pide cadea para Xesús Anxo López Pintos, quen hoxe ostenta o cargo de secretario comarcal da CIG en Ferrol. Segundo o informe do atestado da Policía Xudicial, un axente di que o acusado lle chegou a golpear na cabeza en dúas ocasións e que, unha vez no chan, "lle propinou varias patadas".

Defensa e solidariedade
O xuízo celebrarase este xoves en Ferrol, para cando está convocada unha concentración en protesta e solidariedade co acusado. López Pintos nega as agresións que lle imputan, ao tempo que asegura que, en todo caso, o agredido foi el mesmo. "Iso é falso", di o sindicalista, quen relata que "en ningún momento colleu pedras nin deu patadas aos axentes que estaba alí". Ademais, precisa que naquela zona onde se produciron os feitos "non había pedras" e que o único que fixo foi "tratar de calmar os ánimos naqueles momentos de tensión". Finalmente, acusa ao goberno de entón (PP) "de posicionarse de forma partidista a favor da patroa maior e provocar así todo o conflito".


Ligazóns

4,63/5 (19 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí:



Mugardos foi o escenario de múltiples enfrontamentos entre dous sectores da confraría no verán de 2001
Mugardos foi o escenario de múltiples enfrontamentos entre dous sectores da confraría no verán de 2001
O acusado ocupa hoxe o cargo de secretario comarcal da CIG en Ferrol
O acusado ocupa hoxe o cargo de secretario comarcal da CIG en Ferrol