Vieiros

Vieiros de meu Perfil


Lusofonía

Xestionado por Vieiros
RSS de Lusofonía
Seringueiro, pioneiro na defensa ambiental

Brasil lembra o Chico Mendes no seu vixésimo cabodano

Terratenentes do estado de Acre asasinárono pola súa intensa loita a prol da preservación da Amazonía.

Redacción - 12:00 24/12/2008
Mendes morreu con 44 anos

Mendes morreu con 44 anos

O presidente de Brasil, Luiz Inácio Lula da Silva, chamou a reorganizar a defensa e traballar máis pola preservación da Amazonía, durante a conmemoración do asasinato do líder social Francisco Alves Mendes, máis coñecido como Chico Mendes.

Pioneiro na defensa ambiental, morreu a tiros o 22 de decembro de 1988, fronte á súa casa no remoto estado amazónico de Acre, logo de pasar anos animando as comunidades pobres da zona a protexeren as plantacións de caucho das que dependía o seu sustento.

Grandes terratenentes querían deforestar a selva para adicar eses terreos á gandaría. Dous anos despois, xulgaron e culparon do asasinato do Chico Mendes, tamén seringueiro, un rancheiro local e o seu fillo. O primeiro permanece en arresto domiciliario dende 2007.

Hai só dúas semanas, a Comisión de Amnistía do Ministerio de Xustiza de Brasil recoñeceu oficialmente que o Chico Mendes fora vítima da persecución do Estado, e outorgoulle á súa esposa unha compensación duns 100 mil euros.

Lula da Silva sinalou que coa morte de Mendes, Brasil tomou conciencia da súa importancia, e que homes como el marcan a diferenza na defensa da dignidade humana e na preservación da natureza.

O principal legado de Mendes é a rede das coñecidas como reservas extractivas. Trátase de áreas protexidas da deforestación, onde se lles permite a un número limitado de familias locais gañar a vida a través de, entre outras actividades, a recolección de caucho e froitos secos.


Ligazóns

5/5 (6 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: