Vieiros

Vieiros de meu Perfil


Edición xeral

RSS de Edición xeral
Campaña de WSRW no Sáhara Occidental

O Grupo Calvo marcha de El Aaiun ante a presión dos activistas saharauís

A empresa carballesa esgrime motivos económicos, aínda que este ano vai obter un beneficio neto por riba dos dous millóns de euros.

Redacción - 19:40 21/11/2008

A compañía carballesa de conservas Grupo Calvo decidiu non renovar o contrato de arrendamento da planta que ten no porto da cidade de El Aaiun (Sáhara Occidental) a partir de 2009, segundo anunciou o director xeral desta compañía, Javier Lacoz.

As factorías da empresa en Galiza absorberán a produción de conservas de sardiña, rincha e atún, especies capturadas en augas saharauís. Deica final de ano se elaborarán na fábrica de El Aaiun, onde Calvo leva funcionando dende xaneiro de 2005.

O pasado mes de maio, a organización internacional Western Sahara Resource Watch (WSRW) comezou unha campaña co obxectivo de que o grupo cesase todas as súas actividades nos territorios ocupados por Marrocos.

En xuño contactou coa empresa a través do seu director de Recursos Humanos, Emilio Marcos, que confirmou que Calvo pecharía estas instalacións, mais esgrimiu motivos económicos. No entanto, esta semana, Lacoz informou durante a presentación dun novo produto que o grupo obterá neste exercicio un beneficio neto por riba dos dous millóns de euros.

Dende o WSRW consideran que o dano económico que lle pode provocar a Calvo o continuar en territorios ocupados é moito maior cós beneficios económicos que obtería mantendo as súas actividades na zona.

A organización en defensa dos dereitos do pobo saharauí tiña previsto ampliar a súa campaña de información ás grandes superficies e aos medios de comunicación, así como realizar mobilizacións. "Continuaremos exixíndolle a Calvo que cese todas as súas actividades relacionadas cos recursos naturais saharauís", aseguran.


5/5 (4 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: