Vieiros

Segundo o voceiro de Medio Rural do grupo popular, Roberto Castro, o incremento lineal da cota láctea do 1% para os 27 países da UE, aprobado esta quinta feira en Bruxelas, "máis que unha aterraxe suave, vai supoñer un torpedo á liña de flotación do agro galego", na medida en que se "vai traducir nunha maior invasión deses produtos no Estado e en Galiza".

O PPdeG tamén prognostica unha "baixada permanente dos prezos do leite que perciben os gandeiros galegos", que, segundo dixo Castro, "atravesa xa unha difícil situación económica, derivada dos elevados custes de produción".
Os populares tamén criticaron a actuación da ministra de Agricultura e Medio Rural, Elena Espinosa, sinalando que as "súas orixes non semellan ter xogado a favor dos intereses" de Galiza.

Roberto Castro tamén sinalou que a redución das axudas, pactada en Bruxelas, prexudicaría ao agro, axudando no seu despoboamento. Para terminar con esta situación, o PPdeG propón a creación dun Plan Estratéxico para o Sector Lácteo "que contribúa a minorar o impacto negativo que o acordo vai ter para os gandeiros do noso país".