Vieiros

En marzo de 2006 o Congreso español daba un primeiro paso para rehabilitar a figura de Alexandre Bóveda. Naquelas datas, todos os partidos, agás o PP que optou pola abstención, apoiaron unha iniciativa do BNG que instaba ao executivo español a “promover a rehabilitación institucional, moral, xurídica e persoal de Alexandre Bóveda, fusilado por defender a legalidade democrática e as aspiracións de autogoberno de Galiza”.

O obxectivo último da iniciativa parlamentaria era anulación do consello de guerra sumarísimo ao que foi sometido o dirixente galeguista e que lle acabou custando a vida. O daquela deputado do BNG Francisco Rodríguez lembra que non chegou a levarse a cabo a anulación daquela sentenza por falta de lexislación. Porén, considera que agora si pode conseguirse isto.

Nesta liña atópase a Fundación Alexandre Bóveda, que ten pensado retomar a batalla para conseguir que dunha vez por todas poida revisarse aquela sentenza. O exército español, institución que xulgou a Bóveda, terá que ser quen inicie os trámites para conseguir a reparación histórica.

A pasada semana, o Partido Galeguista anunciou que ía dirixirlle un escrito ao xuíz Baltasar Garzón para que estude a anulación do xuízo contra Alexandre Bóveda.