Vieiros

Vieiros de meu Perfil


GZ-Deportiva

Xestionado por Vieiros
RSS de GZ-Deportiva
hóckey sobre patíns

O Liceo procura o seu primeiro triunfo na casa na OK Liga

Despois de comezar o campionato con bo pé, os coruñeses procuran subir do terceiro posto que ocupan na táboa. Mentres, o Vigo Stick segue axuda económica para ascender.

Redacción - 12:11 07/10/2008
Os xogadores do Liceo celebrando un gol ante o Mataró

Os xogadores do Liceo celebrando un gol ante o Mataró

Os liceístas están situados, polo de agora, de terceiros na clasificación xeral da OK Liga, a primeira a nivel estatal, e esta terza feira xogan un partido na casa fronte o Vilanova, o 12º clasificado. Será o segundo partido na casa dende que comezou a liga, e en xogo están os puntos da terceira xornada do campionato, aprazada no seu día debido a que os coruñeses estaban disputando o Mundial de Clubes en Reus.

O posto que ostentan na clasificación e o factor cancha sitúan os liceístas como claros favoritos, pero o Vilanova non llo vai poñer doado. Ademais, aínda pesa o cansazo dun intenso mes de setembro co Torneo Internacional de Vigo, o comezo da tempada e o Mundial de Clubes. Agora queda centrarse na liga e non perder puntos en Riazor. Os coruñeses veñen de gañarlle a domicilio ao Mataró. Na primeira xornada da OK Liga empataron na casa contra o Igualada, na seguinte gañáronlle ao Shum Maçanet.

O Vigo Stick subsiste
Nunha situación ben complicada, o clube vigués mantense, ademais como un dos favoritos de 1º División para loitar polo ascenso á OK Liga, xunto clubes como o Cerdanyola ou o Areces Elecinco.

A pasada fin de semana xogaba o torneo organizado polo Juventud de Viana, quedando terceiro na clasificación, transmitíndolle aos seus afeccionados unhas sensacións moi positivas en canto ao estado de forma dos xogadores. A súa calidade reflíctese no seu xogo, mais a súa continuidade non está de todo asegurada. Parece que a súa xunta directiva aínda anda procurando apoios para garantir a viabilidade da entidade de cara ao futuro do equipo nunha 1º División que podería quedarlles pequena a nivel deportivo.


0/5 (0 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: