Vieiros

No que vai de lexislatura os números do Produto Interior Bruto non evolucionaran en Galiza entre un trimestre e o seguinte de xeito tan moderado. Con todo, o 0,2% que no segundo trimestre do ano definiu o Instituto Galego de Estatística para a economía do país amosa unha lixeira vantaxe sobre o conxunto do Estado español.

O 2,4% de crecemento anual do PIB queda tamén amplamente por riba da media estatal do 1,8%, malia que é case a metade do ritmo de crecemento acumulado que a economía galega amosaba hai un ano. A cifra actual queda ben por baixo do 3,5% prognosticado pola Xunta canda aos orzamentos do último ano, malia que esa previsión xa fora revisada o pasado mes de abril. Daquela, o conselleiro de Economía e Facenda, Xosé Ramón Fernández Antonio, fixara unha redución de sete décimas para a previsión de crecemento do PIB neste exercicio, deixándoa no 2,8%.