Vieiros

Vieiros de meu Perfil


Edición xeral

RSS de Edición xeral
Un ano despois da aprobación da lei

O PP agoira que o PSOE "argalla" para evitar que Galiza teña policía propia

O voceiro parlamentario en Xustiza e Interior do PPdeG, Xesús Palmou, di ser pesimista despois dos últimos pronunciamentos públicos chegados do goberno español.

Redacción - 09:45 11/08/2008

Xesús Palmou interpreta que de confirmárense "os temores" Galiza seguirá sendo "a única comunidade histórica que careza de policía autonómica propia". O deputado do PpdeG queixouse esta fin de semana de que, ademais da indiferenza do goberno español, o propio conselleiro de Presidencia se teña amosado publicamente en datas recentes a prol de "manter o actual esquema", cunha unidade adscrita á policía estatal. Recorda ademais que o ministro de Interior afirmou que o seu departamento non apoiará a creación de novas policías que se sumen ás tres que existen no Estado (os Mossos d'Escuadra, en Cataluña; a Ertaintza, en Euskadi; e a Policía Foral, en Navarra). Segundo Palmou, o PSOE "argalla unha manobra" para impedir que Galiza teña o seu propio corpo de seguridade.

De paso, o voceiro de Interior do PPdeG no Parlamento, e tamén ex conselleiro de Xustiza, recordou que o goberno do PP creou en 1992 a Academia Galega de Seguridade, iniciativa que Palmou considera "un paso fundamental" cara á futura policía galega. Ademais, o ex conselleiro acusa ao actual Goberno de "tirar pola borda o proxecto de lei e os restantes trámites que deixara ultimados o anterior executivo do PPdeG para crear esa unidade na actual lexislatura".

Aproveitou ademais Xesús Palmou para recordar o freo que en Madrid o goberno español lle impuxo á transferencia de competencias en materia de tráfico malia o consenso parlamentario en Galiza. Así, o deputado popular conclúe que estas dúas cuestións serían exemplo da "escasa vocación autonomista dos socialistas galegos" aos que acusa de votar "unha cousa aquí e outra en Madrid" e ao "nulo peso político de Emilio Pérez Touriño no PSOE estatal.


5/5 (2 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: