Vieiros

Vieiros de meu Perfil


Edición xeral

RSS de Edición xeral
CAMPAÑA ROUPA LIMPA

Amarante esixirá salarios dignos na xunta de accionistas de Inditex

Denuncia que en moitos países non se cobre o custo mínimo para sobrevivir, nin unhas mínimas condicións laborais.

Redacción - 09:00 15/07/2008

A ONG Amarante Setem estará presente o martes na xunta de accionistas de Inditex, no nome da Campaña Roupa Limpa, para esixir garantías reais na mellora das condicións das persoas que traballan para a multinacional. As súas reivindicacións céntranse en conseguir máis transparencia na memoria da empresa, datos concretos sobre salarios dignos, intermediarios e auditorías, e indemnizacións á vítimas da fábrica Spectrum de Bangladesh.

Amarante denuncia que Inditex produce en moitos países empobrecidos onde se ofrecen salarios miserábeis e non se respecta a liberdade sindical. Nalgúns casos, o diñeiro que cobran as traballadoras, como en Blangladesh ou Camboxa, non chega para cubrir as súas tres comidas diarias. Ademais, van acompañados de 10 a 12 días seguidos sen descanso e xornadas de 76 horas á semana. Aínda que no código de conduta da empresa fica recollido este punto, non hai constancia de que se estea a cumprir.

Segundo os datos achegados pola ONG, en Bangladesh os salarios son de 22 euros, fronte aos 50 necesarios para vivir. No Vietnam, cóbranse 32 e precísanse 56. En Marrocos, os 150 euros non alcanzan os 250 necesarios.

Ademais, Amarante indica que o modelo de Inditex premia os intermediarios, mantén prazos de entrega moi curtos e só fai contratos de produción puntuais e baseados no custe. Esta política impide estabelecer relacións a longo prazo cos proveedores que axuden a que as prácticas ofrezan contratos estábeis, o que impide chegar á economía máis xusta da que Inditex fala na súa memoria.

No referente ás indemnizacións ás vítimas de Spectrum, a Campaña Roupa Limpa entregaralle a Inditex unha carta dos traballadores da fábrica, que se derrubou hai máis de tres anos, reclamando o pago das pensións dos feridos e das viúvas que faltan por conceder. Inditex comprometérase a indemnizar as vítimas, que tres anos despois seguen a agardar, segundo informa Amarante.

Roupa Limpa é unha campaña internacional que ten como obxectivo mellorar as condicións laborais no sector téxtil. Traballa en doce países europeos e está formada por coalicións de sindicatos e oenegués.


5/5 (6 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: