Vieiros

Vieiros de meu Perfil


Edición xeral

RSS de Edición xeral
Consello da Xunta

Touriño pide tempo para reformar "como é debido" a Lei Electoral de Galiza

O Goberno non remitiu o texto da modificación ao Parlamento, polo que queda adiada a redución do prazo de tres días para recontar o voto exterior.

Redacción - 19:30 03/07/2008
Touriño, este xoves

Touriño, este xoves

O presidente do Goberno, Emilio Pérez Touriño, explicou este xoves que agarda aprobar no próximo Consello da Xunta o proxecto de reforma da Lei Electoral, que finalmente non se abordou na xuntanza desta semana porque "hai que ter un tempo imprescindíbel" para redactar os cambios "como é debido: sen equívocos nin ambigüidades".

Na conferencia de prensa posterior ao Consello, Touriño recordou que foi o Parlamento quen lle pediu á Xunta que modificase a Lei Electoral de Galiza para reducir o prazo para o reconto de votos procedentes da diáspora, no marco das recomendacións do ditame da comisión de investigación sobre a suposta axente electoral.

O xefe do Executivo manifestou a vontade do Goberno de atender esa indicación e modificar a lei para recuperar o prazo de tres días como máximo para o reconto do voto emigrante. Esta será tramitada polo procedemento de lectura única no Parlamento. O anterior Goberno reformara a lexislación en 2004 para ampliar o prazo de escrutinio do voto CERA, e con esta nova revisión adoptaranse os tempos estipulados pola Lei Orgánica do Réxime Electoral Xeral.

Aprobación adiada tamén no Parlamento

Precisamente, o primeiro punto da Xunta de Portavoces, que tivo lugar este xoves no Pazo do Hórreo, recollía a "audiencia sobre a proposta de tramitación en lectura única" do proxecto de lei, mais segundo denunciou o voceiro parlamentario dos populares, Manuel Ruíz Rivas, a reunión "comezou polo punto dous" sen "dar explicacións", nun intento "de tomar o pelo ao PPdeG".

Segundo recoñeceu o portavoz parlamentario do PSdeG, Ismael Rego, o Goberno "non remitiu" o texto de modificación da Lei Electoral de Galicia, pero asegurou que "o fará nos próximos días" para que poida ser tramitado no Parlamento "en tempo e prazo", en referencia ás próximas eleccións lexislativas.


5/5 (1 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: