Vieiros

As vacacións de Mr. Bean, con máis de 15,25 millóns de entradas vendidas, foi a película europea máis vista na UE en 2007, segundo os datos do Observatorio Audiovisual Europeo.

Séguenlle as francesas La Môme, con máis de 7,2 millóns de entradas e Taxi 4, con 5,3 millóns, mentres que en cuarta posición está a coprodución franco-británica Hot Fuzz, con 4,8 millóns. O quinto posto ocúpao a española El orfanato, con 4,2 millóns.

Segundo o Observatorio Audiovisual Europeo a produción de películas europeas rexistrou un lixeiro incremento até chegar aos 921 longametraxes, impulsada sobre todo polo aumento da actividade nos estados español e francés.

919 millóns de entradas vendidas
Dezaoito das películas máis vistas na Unión Europea eran estadounidenses e só As vacacións de Mr. Bean e La Môme lograron colocarse entre os filmes máis vistos.

Ademais, o Observatorio salientou que durante 2007 a asistencia ás salas na UE reduciuse un 1,3% con 919 millóns de entradas vendidas, aínda que o cinema europeo recuperou parte da cota de mercado, que se situou no 28,8%.