Vieiros

Experimenta danza, EscénaTe, Mita Beutel, Mudanza, Guillermo Weickert, Ruth Balbís ou David Loira son algúns dos artistas e compañías que neste 29 de abril conmemorarán o Día Mundial da Danza con espectáculos públicos, que están tendo como escenario un conxunto de espazos non demasiado habituais, como por exemplo a cadea de Monterroso, os escaparates de El Corte Inglés da Coruña e Vigo, o Museo Provincial de Lugo, o Verbum de Vigo, ou a Galería de Arte Ana Vilaseco da Coruña.

Trátase do proxecto Espazos que danzan, organizado polas produtoras Experimentadanza e EscénaTe, e que durante tres días (a fin de semana pasada e este martes día 29) levou a danza á rúa, con obxectivo de integrala na sociedade e nos espazos arquitectónicos. Este martes A Coruña abrirá a xornada no Centro Cívico do Castrillón coa actuación de Leo Rodríguez y Carlota Pérez. En Vigo, as citas son ás seis da tarde no Corte Inglés de Gran Vía, e ás sete no Verbum, cos espectáculos de Mita Beutel, Mudanza, Guillermo Weickert e Amparo Novas. Pecharán a xornada Experimentadanza e David Loira no Museo Provincial de Lugo.