Vieiros

A asociación PuntoGal, que ten como principal obxectivo conseguir un dominio de internet para a nosa cultura, conseguiu máis de 700 sinaturas durante o encontro Xuventude Galiza Net, que se desenvolveu do 14 ao 16 de marzo. Coas novas incorporacións, PuntoGal xa supera os 8.000 apoios individuais ao dominio.


A asociación estivo presente mediante un posto, situado á entrada do Palacio de Congresos e Exposicións de Santiago, por onde pasaron máis de 1.500 persoas de todas as idades. Moitas delas preguntaron que era iso do puntogal, polo que recibiron material informativo. Ademais, as persoas que asinaron obtiveron a cambio como agasallo camisetas co lema "Estouche a punto.gal" e adhesivos co logo "eu.gal".