Vieiros

"A explotación ten destruído a canle e a zona de servidume da cabeceira do Turia", quéixanse desde a Asociación para a Defensa Ecolóxica de Galiza, Adega. O colectivo protesta tamén pola explotación "dos mesmos taludes da estrada, sen autorización para elo e sen que se teñan adoptado medidas de seguridade adicionais para os usuarios da estrada". Repróchanlle ademais á Delegación Provincial de Medio Ambiente que cualifiquen como "simplemente molesta" unha explotación mineira que está usando explosivos, no canto de definila como "perigosa".

Tres meses despois da presentación no Concello de Riotorto e na Dirección Xeral de Urbanismo da solicitude de "nulidade" da licenza municipal e da autorización urbanística, quéixanse desde Adega de que non se dese ningunha resposta ao respecto. "Cando se está a afectar tan gravemente a cabeceira dun río, estamos a afectar ao conxunto do río en toda a súa lonxitude", advirten. Á beira poden ver imaxes da concentración que tivo lugar na zona o pasado xoves.