Vieiros

Vieiros de meu Perfil


Edición xeral

RSS de Edición xeral
Voz galega desde Chiapas (6)

Nova revolución

Crónica de Iván Prado, director da caravana solidaria de Pallasos en Rebeldía, un ano máis en Chiapas.

Iván Prado - 11:15 04/01/2008

Actuar cos compañeiros zapatistas é unha gozada. Por iso, cando chegamos á sexta e última actuación deste tramo da xira, que se detén para que poidamos participar da xornada de encontro das mulleres zapatistas co mundo, no caracol da garrucha, todo se desenvolve entre a festa e a tristura. A festa polo ben que saiu a actuación, a cantidade de risas que conseguimos, a alegria de voltar a unha comunidade realmente fermosa na que de todas as casas de guano e de madeira saen berros de Lokonuk e de pallasos..., pero tamén a tristeza de saber que nos imos separar destes grandes compañeiros de viaxe.

Nova revolución é unha comunidade sacada dunha película dos bos anos de Hollywod. Era unha finca cafetaleira que os compas tomaron no 94 a costa de moita forza e sufrimento, rodeados polos paramilitares e o exército privado do propio finqueiro. Entre as matas de frijol e os plataneiros aparecen restos da mole industrial en forma de mensaxe póstuma do capital que aquí explotaba xentes e terra.

As camionetas enferruxadas fan de improvisado parque de xogos infantís e as oficinas do capataz son a casa común da xente na que fan a misa e mailas asembleas.

Hoxe Lokonuk está na sua salsa, a rapazada persígueo por toda a comunidade e os xogos improvisados dan paso a unha entrevista gravada coas autoridades que contan para a cámara de Anna e o documental dos pallasos a dura historia de ocupación e da actual división que sofre a comunidade a mans dos partidos.

Moitas das familias que chegaron aquí viñan escapando da morte segura na comunidade da que os paramilitares os desaloxaron, pero baixo o EZLN atoparon teito e terra. Hoxe, de novo, teñen que prepararse para loitar no seo da sua familia contra o virus da corrupción do capital e os seus lacaios, os partidos. De momento van gañando as risas e a festa. Veremos o que pasa cando mañá marchemos cargando todos os vultos polas veredas, camiño da priista sabanilla.

Aquí deixamos amores e recordos......

Crónicas anteriores


5/5 (1 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: