Vieiros

Segundo a Audiencia Nacional, os dous mozos participaron o pasado 13 de setembro nunha queima de fotografías de El-Rei na praza Del Vi de Girona. Nun comezo a fiscalía pedía un ano e tres meses de prisión, mais despois a pena rebaixouse a unha multa de 5.460 euros a repartir entre os dous.

Non lles deixaron falar catalán
Segundo conta o diario dixital catalán, Vilaweb, nada máis comezar a vista, o xuíz José María Vázquez Honrubia prohibiulles aos acusados expresarse en catalán, argumentando que "un cidadán español de trinta anos coñece e fala perfectamente o castelán".

Polo seu lado, os dous acusados admitiron ter queimado as fotografías dos Borbóns, mais dixeron que o acto formaba parte dunha "protesta simbólica e pacífica". Ás portas da Audiencia Nacional había unha concentración de apoio, e na xornada da segunda feira, á tardiña, houbo ducias de concentracións a favor da absolución dos dous mozos en varias cidades do Estado.

Non é o único caso aberto contra a queima de imaxes de El-Rei
Hai aínda outro proceso aberto pola queima de fotografías dos reis que leva o xuíz Fernando Grande-Marlaska contra outros 18 mozos que participaron nunha concentración, tamén en Girona, o 22 de setembro. Tamén están imputados por inxurias á coroa, mais 17 deles como autores, e un só como indutor.

En relación a este outro proceso, a organización Alerta Solidària acusa aos Mossos d'Escuadra de facer as detencións en relación aos ficheiros políticos que posúen (prohibidos pola lei), posto que naquela outra concentración participaron unhas 50 persoas, e só 18 foron identificadas; curiosamente as que tiñan algún tipo de militancia política.