Vieiros

"Seica para o presidente provincial isto é unha comedia", queixouse Xosé Manuel Pérez Bouza, voceiro do BNG na Deputación de Ourense. "Pois para nós non o é", afirmou, defendendo o dereito dos cidadáns a "saber" polo miúdo das retribucións aos seus cargos públicos e do patrimonio co que estes contan. "Pedimos o que está na lei", subliñou Pérez Bouza, pedindo "transparencia total" na institución.

Os nacionalistas insinúan que se cadra os deputados do PPdeG o organismo provincial non queren revelar que o seu patrimonio "non se axusta aos soldos que percibiron" durante estes anos e, en consecuencia, "seríalles moi difícil de explicar ante a cidadanía como acumularon un patrimonio que non se corresponde cos salarios que percibiron do erario público".