Vieiros

Hai poucos días que unha traballadora da Residencia da Terceira Idade de Chantada foi despedida do seu traballo no centro. Acababa de presentar a súa candidatura pola CIG nas eleccións sindicais. De xeito inmediato, o día seguinte, a dirección do centro, xestionado pola orde relixiosa das Mercedarias da Caridade, comunicoulle que prescindía dos seus servizos.

A dirección argumentou presuntos problemas da traballadora con compañeiras, posibilidade que recoñecen improbábel desde o propio Patronato do xeriátrico, e desde a formación sindical, que subliña a competencia da empregada despedida. Da paradoxal xustificación da dirección dá conta a recollida de sinaturas en apoio dela, que sumou a práctica totalidade do cadro da residencia. Desde o Patronato remítense á cláusula asinada debido á cal se fixo cesión absoluta da xestión do persoal á congregación das Mercedarias da Caridade.

Pero se o primeiro conflito xa fixera que máis dun cento de veciños se botase á rúa nunha marcha contra a decisión das relixiosas, esta semana, a dirección decidía prescindir dos servizos doutra persoa, outra vez dunha traballadora que pretendía acudir ás eleccións sindicais como candidata pola Confederación Intersindical Galega. Desta volta, a manobra foi simplemente a non renovación do contrato. Carme Antas, da federación de servizos da CIG en Lugo, explicoulle a Vieiros que a formación agarda que no acto de conciliación que se producirá en dúas semanas poida corrixirse o acontecido. Para ese mesmo día tamén convocaron unha concentración en Lugo. E habería novas mobilizacións no caso de que non se conseguira a readmisión. De xeito paralelo, solicitaron unha entrevista con Vicepresidencia para expresarlle o malestar co acontecido e facer unha chamada de atención sobre o xeito no que se está xestionando este centro da terceira idade por parte dunha congregación que xestiona un concerto para a atención de preto dun cento de persoas.