Vieiros

Vieiros de meu Perfil


Canal Verde

Xestionado pola Federación Ecoloxista Galega e Vieiros
RSS de Canal Verde
Plan sectorial de acuicultura

Corrubedo reaxe en defensa da súa costa

Este pasado sábado, membros de ADEGA e a Plataforma Medioambiental de Corrubedo expuxemos aos veciños/as de Teira e Corrubedo en qué consisten os plans da Consellería de Pesca para a punta do Corgo-Laxe Brava: nin máis nin menos que a meirande piscifatoría de Galiza, con 308.000 m2. Este megaproxecto únese ás ampliación das piscifatorías de Seráns (115.000 m2 e Couso (55.000 m2), de xeito que nun treito de 10 km de costa ocuparanse case medio millón de m2 de solo industrial, e iso ás portas dun parque natural. Toma desenvolvemento sustentábel!

ADEGA - 12:31 06/08/2007
Tags:

  O Plano Sectorial de megaparques de acuicultura en terra agasalla aos veciños e veciñas de Corrubedo coa instalación meirande de todas: 308.000 m2 nunha costa prácticamente virxe e merecente de facer parte do Complexo Húmido de Corrubedo. Á desfeita paisaxística haberá que engadir tamén, as consecuencias do vertido de millóns de m3 de augas cunha forte carga contaminante, precisamente nun litoral de gran riqueza pesqueira e marisqueira.

  Malia a que a superficie desta industria está estratéxicamente fóra do LIC de Corrubedo, non pode pensarse que non se van ver afectados os sensíbeis hábitats e especies de interese europeo dun espazo protexido que xa ten que soportar canteiras, campings, os vertidos industriais de dous polígonos e proximamente, se non o evitamos, tres megapiscifatorías en 10 km de costa alén da macrodepuradora de Aguiño.

 Curiosamente, o lugar que a Consellería de Pesca propón para esta instalación, a punta do Corgo ou Laxe Brava, correspóndese coa superficie que Medio Ambiente quere ampliar na Rede Natura (LIC Complexo Húmido de Corrubedo). Deste xeito, Medio Ambiente recoñece a importancia dos valores naturais deste espazo mentres que Pesca quere ocupalo con 30 hectáreas de cemento!!! Este feito pon claramente de manifesto a falla de coordenación dunha administración na xestión territorial do país, alén de indicarnos que o plano sectorial acuícola está deseñado por e para os intereses das empresas do sector.

  Os veciños/as e os ecoloxistas non imos tolerar que os intereses dunha empresa privada estén por riba do interese xeral na conservación do ambiente e do dereito do pobo de Corrubedo a aproveitar de xeito racional e sustentábel os recursos naturais deste espazo. Non sería tampouco de xustiza que a administración "premiara" a Corrubedo con esta instalación logo de que os seus habitantes teñan defendido e contribuído a preservar un dos espazos emblemáticos da diversidade natural galega.


0/5 (0 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: