Vieiros

Vieiros de meu Perfil


GZ-Deportiva

Xestionado por Vieiros
RSS de GZ-Deportiva
piragüismo

David Cal queda primeiro e pasa á seguinte fase do Mundial en C-1 1000

Falta un ano menos un día para que comecen oficialmente os Xogos Olímpicos de 2008. A partir desta xornada e até o domingo, os mellores palistas do mundo loitan polas prazas para Pekín.

Redacción - 10:33 09/08/2007
O público do Mundial

O público do Mundial

Madrugando para coller o K-4, as galegas Teresa Portela e Sonia Molanes, xunto con Isabel Fernández e Jana Smidakova, debutaron no Mundial de piragüismo de Duisburgo, ás 8:06 horas, e ficaron cuartas, por detrás de Alemaña, Italia e China. Terán que ir á repesca e ficar entre as tres primeiras para coller praza Pekín.

David Cal ficou primeiro na carreira da mañá en C1 1000, e voltará ás semifinais pola tarde de C1 500. O cangués comezou con forza, e está entre os favoritos para loitar polo primeiro posto. Os seus tempos de adestramento, antes de viaxar a Alemaña, eran moi bos, e o seu peso, de 85 quilos, é case o mesmo que tiña en Atenas, cando trouxo dúas medallas para a casa.

A media mañá compite a parella formada por Bea e Mascato, que aínda que non van remar na distancia curta -a súa favorita- deben ficar entre os seis primeiros de C-2 1000 para pasar á final.

Os outros galegos no Mundial


José Luis Bouza, que fai parella co asturiano Rafael Menéndez en C-2 500, vai tentar meterse directamente nas semifinais a sexta feira ás 10:24 horas.

Borja Prieto e Jaime Acuña, xunto con Saúl Craviotto e Manuel Muñoz, tamén teñen o obxectivo da clasificación olímpica. Reman ás 11:22 horas da quinta feira.

Carlos Pérez Rial é un dos palistas máis rápidos do mundo, pero case sempre é unha incógnita como vai render en cada carreira. O de Aldán, ademais de ir pola medalla -que xa sabe o que é levar unha dun Mundial pendurada do pescozo- debe situarse entre os 8 primeiros para asegurarse un sitio de seu en Pekín. Rial rema a sexta feira ás 8:36 horas, no seu K-1 500.


5/5 (8 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: