Vieiros

A deputada defendeu a importancia de "impulsar medidas que combatan a homofobia". A proposta suxire, entre outras medidas, a inclusión de cláusulas nas ordes de axudas e subvencións que impliquen que se poderá retirar ou denegar cando a entidade promova a homofobia.

Segundo Pontón, é moi importante que dende as institucións públicas "se realice un labor de visibilidade e concienciación", para desmontar os prexuízos homófobos. A iniciativa tamén subliña a necesidade de focalizar as medidas no ámbito da mocidade. Na formación do persoal técnico de xuventude e mediadores xuvenís deben figurar contidos sobre a homosexualidade, para axudar, "a que os e as adolescentes que viven a súa condición sexual de xeito problemático poidan superar esta situación".

Esta proposta insta tamén a recuperar a memoria das persoas que foron perseguidas polo franquismo pola súa condición sexual e a abrir un debate sobre a discriminación no eido laboral. Tamén suxire realizar campañas e declaracións de condena e repulsa pública das actitudes homófobas.