Vieiros

Vieiros de meu Perfil


Edición xeral

RSS de Edición xeral
Do 16 ao 19 de xullo

Un curso de verán analizará a transparencia informativa

A Facultade de Ciencias da Comunicación acollerá este verán unhas xornadas e obradoiros sobre os principios da comunicación.

Redacción - 13:23 13/06/2007

A profesora Antía López Rodríguez dirixe este curso de verán, validábel por 2 créditos de libre configuración. A matrícula pode realizarse en liña dende o 21 de maio, e dende este 13 de xuño até o 6 de xullo, tamén presencial. Aquí podemos consultar o programa. O prezo da matrícula é de 120 €, ou 70 na taxa reducida (para o alumnado universitario, persoas desempregadas, e profesorado e PAS da USC).

O curso, presentado este mércores 13 na sede do Club Internacional de Prensa, está organizado pola propia Facultade e a Vicerreitoría de Cultura da USC, e conta coa colaboración da Secretaría Xeral de Comunicación da Xunta de Galicia, a CRTVG, a Deputación da Coruña e a Fundación Caixa Galicia.

Como explicou o secretario xeral de Comunicación, Fernando Salgado, estase a rexistrar un cambio na produción mediática, motivada en parte pola eclosión de novos formatos, xéneros e estilos. "Esta produción mediática caracterízase polo seu exceso, que acaba desinformando por saturación, se lembramos a Baudrillard e a "éxtase da comunicación"; e, sen segundo lugar, pola transparencia, unha das columnas vertebrais da nova arquitectura mediática, que busca a verosimilitude, conferirlle autenticidade ao texto".

"A transparencia non é un ollo desbocado detrás dun asexadoiro"

Para Antía López, directora do curso, a cuestión da transparencia informativa pode ser abordada dende dúas perspectivas: como un deber na comunicación mediática contemporánea, e como unha demanda cidadá. "Cómpre abordala contra a desviación do principio: tense convertido nun risco estilístico, formal, informativo e programático. Ofréceselle unha verosimilitude ao espectador, por medio de formatos de transparencia. Isto é un síntoma cultural: o estatuto de público corresponde con agardar unha serie de estímulos. É como un reclamo: ofrecer máis e mellor, e no extremo, "velo todo". Pero a tarefa mediática é facermos comprensíbel o opaco, non sermos un ollo desbocado detrás dun asexadoiro. O rexoubeo é especulativo, non informativo nin representacional".

Para rematar, o director de Relacións Externas e Comunicación da CRTVG, Pastor Lorenzo Sola, engadiu: "vivimos na sociedade da persuasión, e é totalmente oportuno afondar nos principios de transparencia, verosimilitude e autenticidade". Antía López engadiu algunhas cuestións sobre o enmascaramento dos discursos para disfrazalos de transparencia, aludindo a formatos como o do reality show, e á libre circulación de información na rede, e a semellanza coa circulación liberal do capitalismo: "ás veces esquecemos que se crea sentido onde se selecciona, non onde todas as posibilidades están diante".


5/5 (1 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: