Vieiros

A Universidade de Zagreb está a desenvolver un novo método para atopar as minas que aínda inzan os chans de Croacia. Os riscos que estas bombas supoñen para a poboación obrigaron os investigadores a atopar solucións imaxinativas. E, nun país con gran tradición na apicultura, as abellas convertéronse nunhas importantes aliadas.

O profesor Nikola Kezić tivo a idea de empregar os insectos que fabrican o mel para detectar as minas que aínda non atoparon os equipos antiexplosivos. As abellas adéstranse nunha tenda onde se lles ensina a relacionar o aroma da comida co do TNT.

Unha vez remate o proceso de adestramento, os animais ceibaranse nas zonas supostamente limpas de minas para ver se detectan algún explosivo máis. Se a técnica ten éxito, estenderase a outras zonas dos Balcáns, afectadas polo mesmo problema. Calcúlase que máis de mil quilómetros cadrados de Croacia están afectados por arredor de 250.000 minas.