Vieiros

Vieiros de meu Perfil


Lusofonía

Xestionado por Vieiros
RSS de Lusofonía
Paralizado o metro de Lisboa

Folga xeral en Portugal contra o goberno socialista de Sócrates

O paro, que non secunda a UGT, pretende unha mudanza de rumbo nas políticas económicas, sociais e laborais, tanto no sector público como no privado.

Redacción - 11:50 30/05/2007
José Sócrates

José Sócrates

Portugal afronta esta cuarta feira unha folga xeral, a primeira que se realiza no país luso contra un goberno socialista dende a restauración da democracia, en 1974. A Confederação Geral dos Trabalhadores Portugueses, CGTP, convocou o paro en protesta pola política económica e laboral do Executivo que dirixe o Primeiro Ministro, José Sócrates, que no entanto, non secunda a União Geral de Trabalhadores, UGT.

A CGTP chamou aos portugueses á folga para protestaren polo aumento do desemprego e a precariedade laboral, así como tamén as políticas de flexibilidade nos contratos que pretende implantar o goberno. Ademais, a conxelación dos ascensos automáticos ou a mobilidade dos traballadores no funcionariado, son outras das razóns arguidas pola fronte sindical.

"A evolução do mercado de emprego no 1º trimestre de 2007 fica novamente marcada pelo aumento do desemprego. É o segundo trimestre consecutivo em que se verifica um crescimento do desemprego em termos homólogos e o segundo em que a taxa desemprego é superior à verificada em termos médios na União Europeia a 27", sinalan na súa web.

Seguimento desigual ao longo da mañá

En Lisboa, o metro e as ligazóns fluviais entre as marxes do Texo víronse moi condicionados debido á folga xeral, segundo informa o diario Público, mais o resto de transportes que operan na bisbarra funcionaron normalmente durante a primeira hora da mañá, segundo fontes das empresas.

Até as 8.00 horas, a circulación do Metropolitano de Lisboa estivo totalmente parada e as estacións pechadas. As conexións fluviais polo Texo tamén pararon, fóra de dúas viaxes de ida e volta entre o Barreiro e o Terreiro do Paço, contempladas nos servizos mínimos.

Porén, as liñas ferroviarias na área da grande Lisboa (Sintra, Cascais e Azambuja) funcionaron ao cento por cen, segundo indicou a compañía ferroviaria lusa. A mesma fonte apuntou, con todo, problemas noutras conexións, como na liña do Porto, de Vouga e do Douro.


5/5 (2 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: