Vieiros

A flota de taxis amarelos da cidade de Nova York estará formada integramente por vehículos híbridos en 2012, e todos os coches de aluguer existentes na cidade deberán cumprir o vindeiro ano as novas normas sobre emisións contaminantes, de acordo cos plans do alcalde da metrópole, Michael Bloomberg.

Actualmente existen en Nova York un total de 375 taxis equipados con sistemas híbridos, que combinan un motor eléctrico e outro de combustión, mentres que a flota total de taxis elévase a unhas 13.000 unidades.

Reducir as emisións nun 30% até 2030
Os plans do alcalde Bloomberg consisten en elevar a flota de taxis híbridos até un milleiro de vehículos en outubro de 2008, e seguir aumentando a implantación destes automóbiles ecolóxicos a un ritmo do 20% anual até 2012.

O cambio dos sistemas de propulsión da flota de taxis enmárcase no proxecto de sustentabilidade para a cidade de Nova York, que fixa como obxectivo reducir nun 30% as emisións de dióxido de carbono até 2030.