Vieiros

O alcalde de Carballo, Evencio Ferrero, anunciou que recorrerá o auto de suspensión do concurso-oposición a asesor urbanístico que decretou un xulgado da Coruña. O proceso fora denunciado polo Partido Popular, que consideraba discriminatorio o feito de que a proba de galego fose eliminatoria.

Ferrero lembrou que o Partido Popular xa aceptara o mesmo requisito en dous procesos selectivos anteriores. Segundo o rexedor carballés, na actualidade están a traballar no concello dúas funcionarias seleccionadas en probas nas que o coñecemento da lingua era eliminatorio. Neses dous casos, o PP formara parte do tribunal e non fixera ningunha reclamación.

Ademais, o alcalde reiterou que a selección de asesor urbanístico xa fora suspendida cautelarmente polo executivo local ao coñecer a denuncia do grupo da oposición, e antes de se coñecer o auto do xulgado do Contencioso-administrativo número 1 da Coruña. En todo caso, Ferrero dixo: “Terá que ser o xulgado o que diga e resolva dun xeito ou doutro”.